ಬಾಗಲಕೋಟೆಯಲ್ಲಿ ಡಿಜೆ ಸ್ಪರ್ಧೆ: ಯುವಕರು, ಮಕ್ಕಳಿಂದ ಅಶ್ಲೀಲ ಸನ್ನೆ... ಈ ಕೆಟ್ಟ ಪರಂಪರೆಗೆ ಹೊಣೆಯಾರು*
ಬಾಗಲಕೋಟೆ:
ವಿಘ್ನಗಳನ್ನು ನಿವಾರಣೆ ಮಾಡುವ ಗಣೇಶ ಮೆರವಣಿಗೆಯಲ್ಲೇ ನೂರಾರು ವಿಘ್ನಗಳು ಕಂಡು ಬಂದಿವೆ. ಹುಬ್ಬಳ್ಳಿಯಲ್ಲಿ ಕಂಡು ಬರುತ್ತಿದ್ದ ಪರಸ್ಪರ ಡಿಜೆ ಸ್ಪರ್ಧೆ, ಆಶ್ಲೀಲ ಸನ್ನೆಯ ಕೆಟ್ಟ ಪರಂಪರೆ ಕೋಟೆಯಲ್ಲೂ ಕಂಡು ಬಂದಿದೆ.
ಬಾಗಲಕೋಟೆ ನಗರದ ಕೆಲವು ಗಣೇಶ ಮಂಡಳಿಗಳ ಮೆರವಣಿಗೆಯಲ್ಲಿ ಪರಸ್ಪರ ಗಣೇಶ ಎದುರಾದಾಗ ಎರಡೂ ಮೆರವಣಿಗೆಯಲ್ಲಿನ ಡಿಜೆ ಸ್ಪರ್ಧೆ ಏರ್ಪಟ್ಟಿದ್ದು, ಮಂಡಳಿಯ ಮೆರವಣಿಗೆಯಲ್ಲಿನ ಯುವಕರು ಪರಸ್ಪರ ಕೆಟ್ಟ ಸನ್ನೆ ಮಾಡಿರುವ ಘಟನೆ ನಡೆದಿದೆ.
ನಗರದ ಪ್ರಮುಖ ಗಣೇಶ ಮಂಡಳಿಗಳು ಕರ್ಕಶ ಸದ್ದಿನ ಪಾಶ್ವಿಮಾತ್ಯದ ಡಿಜೆಗೆ ವಿದಾಯ ಹೇಳಿ ಭಾರತೀಯ ಸಂಸ್ಕೃತಿಯನ್ನು ಅನಾವರಣಗೊಳಿಸುವ ಡೋಲ್ ತಾಶಾ, ಚಂಡೆವಾದನಗಳಿಗೆ ಮೊರೆ ಹೋಗಿರುವಾಗ ಕೆಲ ಮಂಡಳಿಗಳು ಅಪವಾದ ಎಂಬಂತೆ ಡಿಜೆ ತಂದಿದ್ದಲ್ಲದೇ ಪರಸ್ಪರ ಅಶ್ಲೀಲ ಸನ್ನೆಯ ಮೂಲಕ ಕೆಟ್ಟ ಪರಂಪರೆಗೆ ನಾಂದಿ ಹಾಡಿವೆ. ಅದರ ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದು, ಪೊಲೀಸರು ಸಹಕಾರ ನೀಡಲು ಮುಂದಾದರೂ ಇಂಥ ಕೆಟ್ಟ ಘಟನೆಗಳು ಕೋಟೆ ಗಣೇಶೋತ್ಸವಕ್ಕೆ ಕಪ್ಪು ಚುಕ್ಕೆ ಎಂಬಂತೆ ಆಗಿದೆ.
