ಖರ್ಜೂರ ಲಾಡು, ಕಾಯಿಹಾಲಿನ ಹೋಳಿಗೆಯ ರುಚಿ ನಿಮಗೆ ಗೊತ್ತೆ....!

ಮೊದಲ ದಿನದ    ಖಾದ್ಯಗಳನ್ನು ಸಿದ್ಧಪಡಿಸುವ ನಮ್ಮ ರೆಸಿಪಿಗಳ ಬಗ್ಗೆ ಮಹಿಳಾ ಓದುಗರು ಸಾಕಷ್ಟು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ನಾಡನುಡಿ ದೀಪಾವಳಿ ಪಾಕಶಾಲೆಯ ಎರಡನೇ ಭಾಗ ಇಲ್ಲಿದೆ. ಈ ಎಲ್ಲ ಆಹಾರಗಳನ್ನು ಸಿದ್ಧಪಡಿಸಿ ಮನೆಯವರೊಂದಿಗೆ ಸಂಭ್ರಮಿಸಿ.

ಬೆಲ್ಲದ ಅನ್ನ ( ಗುಡನ್ನ)

ಸಾಮಗ್ರಿ: ಅಕ್ಕಿ-1 ಕಪ್‌, ಬೆಲ್ಲ-3 ಕಪ್‌, ಬಾಳೆಹಣ್ಣು-2, ತುಪ್ಪ-ಕಾಲು ಕಪ್‌, ಗೋಡಂಬಿ, ದ್ರಾಕ್ಷಿ, ಬಾದಾಮಿ, ಖರ್ಜೂರದ ತುಂಡುಗಳು-ತಲಾ 25 ಗ್ರಾಂ, ಏಲಕ್ಕಿ ಪುಡಿ-ಅರ್ಧ ಚಮಚ.

ವಿಧಾನ: ಅಕ್ಕಿಯಿಂದ ಅನ್ನ ಮಾಡಿ ಇಡಿ. ಬಾಣಲೆಗೆ ನೀರು ಹಾಕಿ ಬಿಸಿ ಮಾಡಿ. ಇದರಲ್ಲಿ ಬೆಲ್ಲವನ್ನು ಕರಗಿಸಿ ಎಳೆ ಪಾಕ ಮಾಡಿ. ಇದಕ್ಕೆ ಬಾಳೆಹಣ್ಣಿನ ಚೂರುಗಳು, ಅನ್ನ ಮತ್ತು ತುಪ್ಪ ಹಾಕಿ ತಿರುವಿ. ಎರಡ್ಮೂರು ನಿಮಿಷದ ನಂತರ ತುಪ್ಪದಲ್ಲಿ ಹುರಿದ ಗೋಡಂಬಿ, ದ್ರಾಕ್ಷಿ, ಖರ್ಜೂರದ ತುಂಡು ಮತ್ತು ಏಲಕ್ಕಿ ಪುಡಿ ಹಾಕಿ ತಿರುವಿ ಕೆಳಗಿಳಿಸಿ.

ಕಾಯಿಹಾಲಿನ ಹೋಳಿಗೆ
ಸಾಮಗ್ರಿ: ತೆಂಗಿನಕಾಯಿ ತುರಿ-1 ಕಪ್‌, ಹಾಲು-ಮುಕ್ಕಾಲು ಕಪ್‌, ಗಸಗಸೆ-ಅರ್ಧ ಕಪ್‌, ಬೆಲ್ಲ-1 ಕಪ್‌, ಏಲಕ್ಕಿ-3, ಎಣ್ಣೆ-ಕರಿಯಲು, ಉಪ್ಪು-1 ಚಿಟಿಕೆ, ಮೈದಾ ಹಿಟ್ಟು-ಮುಕ್ಕಾಲು ಕಪ್‌, ಚಿರೋಟಿ ರವೆ-ಕಾಲು ಕಪ್‌.

ವಿಧಾನ: ಮೈದಾ ಮತ್ತು ಚಿರೋಟಿ ರವೆಗೆ ಉಪ್ಪು ಹಾಕಿ ಚಪಾತಿ ಹಿಟ್ಟಿನ ಹದಕ್ಕೆ ಕಲಸಿ. ನಂತರ ಒಂದೆರಡು ಚಮಚ ತುಪ್ಪ ಹಾಕಿ ಮತ್ತೆ ಕಲಸಿ ಕಣಕ ತಯಾರಿಸಿಡಿ. ಹುರಿದ ಗಸಗಸೆಗೆ ತೆಂಗಿನಕಾಯಿ ತುರಿ ಮತ್ತು ಏಲಕ್ಕಿ ಹಾಕಿ ರುಬ್ಬಿ. ಬೆಲ್ಲವನ್ನು ಕರಗಿಸಿ ಸೋಸಿ. ಇದಕ್ಕೆ ರುಬ್ಬಿದ ಮಿಶ್ರಣ, ಹಾಲು ಮತ್ತು ಸ್ವಲ್ಪ ನೀರು ಹಾಕಿ ಚೆನ್ನಾಗಿ ಕುದಿಸಿ. ಈಗ ಕಾಯಿ ಹಾಲು ರೆಡಿ. ಆಗಲೇ ತಯಾರಿಸಿಟ್ಟ ಕಣಕದಿಂದ ತೆಳುವಾದ ಪೂರಿಗಳನ್ನು ಲಟ್ಟಿಸಿ ಎಣ್ಣೆಯಲ್ಲಿ ಕರಿದು, ಬಿಸಿ ಕಾಯಿ ಹಾಲಿನಲ್ಲಿ ಅದ್ದಿ ತಕ್ಷ ಣ ತೆಗೆದು ಬಡಿಸಿ.

ಖರ್ಜೂರದ ಲಾಡು
ಸಾಮಗ್ರಿ: ಗೋಡಂಬಿ-ಕಾಲು ಕಪ್‌, ಹಸಿ ಖರ್ಜೂರ-ಅರ್ಧ ಕೆ.ಜಿ, ಬಾದಾಮಿ-ಕಾಲು ಕಪ್‌, ಪಿಸ್ತಾ-ಕಾಲು ಕಪ್‌, ತುಪ್ಪ-2 ಟೇಬಲ್‌ ಸ್ಪೂನ್‌, ಗೋಂದು-1 ಟೇಬಲ್‌ ಸ್ಪೂನ್‌, ಗಸಗಸೆ-1 ಟೇಬಲ್‌ ಸ್ಪೂನ್‌, ಏಲಕ್ಕಿ ಪುಡಿ-1 ಟೀ ಸ್ಪೂನ್‌, ಜಾಕಾಯಿ ಪುಡಿ-ಅರ್ಧ ಟೀ ಸ್ಪೂನ್‌.

ವಿಧಾನ: ಖರ್ಜೂರವನ್ನು ಮಿಕ್ಸಿ ಜಾರ್‌ಗೆ ಹಾಕಿ ತರಿತರಿಯಾಗಿ ಬ್ಲೆಂಡ್‌ ಮಾಡಿ ಒಂದು ಬಟ್ಟಲಿಗೆ ಹಾಕಿ. ನಂತರ ಗೋಡಂಬಿ, ಗಸಗಸೆ, ಬಾದಾಮಿ, ಪಿಸ್ತಾವನ್ನು ತರಿತರಿಯಾಗಿ ಪುಡಿ ಮಾಡಿ. ಬಾಣಲೆಯಲ್ಲಿ ಒಂದು ಟೇಬಲ್‌ ಸ್ಪೂನ್‌ ತುಪ್ಪ ಬಿಸಿ ಮಾಡಿ ಅದಕ್ಕೆ ಗೋಂದು ಹಾಕಿ ಹೊಂಬಣ್ಣ ಬರುವವರೆಗೆ ಹುರಿದು ತೆಗೆದಿಡಿ. ಅದೇ ಬಾಣಲೆಗೆ ಉಳಿದ ತುಪ್ಪ ಹಾಕಿ ಒಣ ಹಣ್ಣುಗಳನ್ನು ಹಾಕಿ ಹೊಂಬಣ್ಣ ಬರುವವರೆಗೆ ಹುರಿಯಿರಿ. ನಂತರ ಇದಕ್ಕೆ ಖರ್ಜೂರದ ತುಂಡುಗಳನ್ನು ಹಾಕಿ ಬಿಸಿ ಆಗುವವರೆಗೆ ತಿರುವಿ. ಇವೆಲ್ಲವನ್ನು ಒಂದು ತಟ್ಟೆಗೆ ಹಾಕಿ ಇಡಿ. ನಂತರ ಇದಕ್ಕೆ ಏಲಕ್ಕಿ, ಜಾಕಾಯಿ ಪುಡಿ ಮತ್ತು ಪುಡಿ ಮಾಡಿದ ಗೋಂದು ಹಾಕಿ ಮಿಶ್ರ ಮಾಡಿ. ಇದನ್ನು ಸ್ವಲ್ಪ ಸ್ವಲ್ಪವೇ ತೆಗೆದುಕೊಂಡು ಸಣ್ಣ ಸಣ್ಣ ಲಡ್ಡುಗಳನ್ನು ಮಾಡಿ.

ಬೇಸನ್ ಬರ್ಫಿ
ಸಾಮಗ್ರಿ: ಕಡ್ಲೆ ಹಿಟ್ಟು-1 ಕಪ್‌, ತುಪ್ಪ-ಮುಕ್ಕಾಲು ಕಪ್‌, ಚಿರೋಟಿ ರವೆ-4 ಟೇಬಲ್‌ ಸ್ಪೂನ್‌, ಸಕ್ಕರೆ ಪುಡಿ-ಮುಕ್ಕಾಲು ಕಪ್‌, ಏಲಕ್ಕಿ ಪುಡಿ-ಅರ್ಧ ಟೀ ಸ್ಪೂನ್‌, ಬಾದಾಮಿ ತುಂಡು-2 ಟೇಬಲ್‌ ಸ್ಪೂನ್‌.

ವಿಧಾನ: ಬಾಣಲೆಯಲ್ಲಿ ತುಪ್ಪ ಬಿಸಿ ಮಾಡಿ ಕಡ್ಲೆ ಹಿಟ್ಟು ಮತ್ತು ರವೆ ಹಾಕಿ ಎರಡು ನಿಮಿಷ ಹುರಿಯಿರಿ. ನಂತರ ಉರಿ ಕಡಿಮೆ ಮಾಡಿ ಸಕ್ಕರೆ ಪುಡಿ ಮತ್ತು ಏಲಕ್ಕಿ ಪುಡಿ ಹಾಕಿ ಐದು ನಿಮಿಷ ತಿರುವುತ್ತಿರಿ. ಕಡ್ಲೆ ಹಿಟ್ಟಿನ ಬಣ್ಣ ಬದಲಾಗಿ ಹಸಿ ವಾಸನೆ ಹೋಗುವವರೆಗೆ ಹುರಿಯಿರಿ. ಬಳಿಕ ಈ ಮಿಶ್ರಣವನ್ನು ಜಿಡ್ಡು ಸವರಿದ ತಟ್ಟೆಗೆ ಹಾಕಿ ಸಮತಟ್ಟಾಗಿ ಹರಡಿ. ಮೇಲೆ ತೆಳ್ಳಗೆ ಹೆಚ್ಚಿದ ಬಾದಾಮಿ ಚೂರುಗಳನ್ನು ಉದುರಿಸಿ. ನಂತರ ಇದನ್ನು ಚೌಕಾಕಾರದ ಬಿಲ್ಲೆಗಳಾಗಿ ಕತ್ತರಿಸಿ.

ಖೋವ ಕರ್ಜಿಕಾಯಿ
ಸಾಮಗ್ರಿ: ಖೋವ-ಮುಕ್ಕಾಲು ಕಪ್‌, ಮೈದಾ ಹಿಟ್ಟು-1 ಕಪ್‌, ತುಪ್ಪ-3 ಟೀ ಸ್ಪೂನ್‌, ಎಣ್ಣೆ-ಕರಿಯಲು, ಉಪ್ಪು-1 ಚಿಟಿಕೆ, ಹೂರಣಕ್ಕೆ ಒಣ ಅಂಜೂರ ಹಣ್ಣಿನ ತುಂಡುಗಳು-ಅರ್ಧ ಕಪ್‌, ಬೀಜ ತೆಗೆದ ಖರ್ಜೂರ-ಅರ್ಧ ಕಪ್‌, ಗೋಡಂಬಿ-10, ಬಾದಾಮಿ-10, ವಾಲ್ನಟ್‌-10.

ವಿಧಾನ: ಒಣ ಹಣ್ಣುಗಳನ್ನು ಸಣ್ಣಗೆ ಕತ್ತರಿಸಿ ಇಡಿ. ಪಾತ್ರೆಗೆ ಮೈದಾ, ಉಪ್ಪು ಮತ್ತು ತುಪ್ಪ ಹಾಕಿ ಮಿಕ್ಸ್‌ ಮಾಡಿ. ನಂತರ ಸ್ವಲ್ಪ ನೀರು ಹಾಕಿ ಗಟ್ಟಿಯಾದ ಹಿಟ್ಟು ಕಲಸಿ. ಇದರ ಮೇಲೆ ತೇವ ಬಟ್ಟೆಯನ್ನು ಇಪ್ಪತ್ತು ನಿಮಿಷಗಳ ಕಾಲ ಮುಚ್ಚಿಡಿ. ನಾನ್‌ಸ್ಟಿಕ್‌ ಪ್ಯಾನ್‌ನಲ್ಲಿ ಖೋವ ಹಾಕಿ ಜಿಡ್ಡಿನ ಅಂಶ ಹೋಗುವವರೆಗೆ ಹುರಿದಿಡಿ. ಬಳಿಕ ಇದಕ್ಕೆ ಒಣ ಹಣ್ಣುಗಳನ್ನು ಹಾಕಿ ಚೆನ್ನಾಗಿ ಮಿಶ್ರ ಮಾಡಿ. ಕಲಸಿಟ್ಟ ಮೈದಾ ಹಿಟ್ಟಿನಿಂದ ಪೂರಿಗಳನ್ನು ಲಟ್ಟಿಸಿ. ಇದರ ಮಧ್ಯ ಒಂದು ಟೇಬಲ್‌ ಸ್ಪೂನ್‌ನಷ್ಟು ಹೂರಣ ತುಂಬಿಸಿ, ಅಂಚನ್ನು ತೇವಗೊಳಿಸಿ ಕರ್ಜಿಕಾಯಿಯಂತೆ ಮಡಚಿ. ಅಥವಾ ಇದರ ಮೇಲೆ ಇನ್ನೊಂದು ಪೂರಿಯಿಟ್ಟು ಅಂಚು ಮಡಚಿ ಗೋಲಾಕಾರವಾಗಿಯೂ ಮಾಡಬಹುದು. ಇದನ್ನು ಕಾದ ಎಣ್ಣೆಯಲ್ಲಿ ಕರಿದು ಗಾಳಿಯಾಡದ ಡಬ್ಬದಲ್ಲಿ ಇಡಿ.